مصلحة الضرائب على التنفس قريبا فى مصر

لو مر يوم على وزير المالية من غير ما يدعى عليه مواطن فى اضرحة أوليا الله الصالحين بيصرخ الوزير قبل ما ينام ويقول يوم من عمرى راح

بس بكل صراحه الراجل دا فنان وانا اشهد له

بيستلهم من وحى خياله الواسع اساليب مبتكرة لاختراع انواع جديدة وغريبة من الضرائب


وفى الحقيقة لم يبقى امامه الان سوى اعداد مشروع قانون لفرض ضريبة على التنفس

ولاكن ازاى ؟؟


تم اختراع عداد يقوم بمهمة عد الانفاس والجهاز دا فى حجم الترمسة يتم تثبيته فى حمالة الفانلة

طيب والى باعو الفانله هيعملو ايه


اقولك انا

هيعلقه فى اقرب استيك

هتسالنى سؤال وجيه وتقولى طيب والى الضرايب حرمتهم من لبس دا ودا هيعملو ايه


اقولك الحكومة شغاله وبتفكر فى كل الاحتمالات

هتزرع الجهاز دا داخل جسم المواطن

وهتتولى المستشفيات الحكومية القيام بهذة العملية على نفقة وزارة المالية


مجــــــــــــــــــــــــــــــانـــــــــــــــا

الممول مش هيدفع ابيض ولا احمر كل الى هيدفعه هو تكاليف فتح غرفة العمليات وتكاليف قفلها بعد العملية


بخلاف طبعا الادوية والشاش والقطن والمطهرات

بالاضافة الى مصنعية الدكاترة واكرامية التمرجية وايجار السرير وتمن المشاريب


يعنى حاجه ببلاش كدا


اما الضرائب على كل الحاجات الى هيدفعها فى العملية دى فهيتم اعفاء المواطن منها وتتحملها وزارة المالية على داير المليم باعتبار ان الفائدة من زرع العداد هتعود فى النهاية للوزارة


طيب اذا مات المواطن اثناء العملية طبعا هيبقى دا تهرب ضريبى والوزارة هترفع قضية على الورئة

محدش هيعرف يضحك على الحكومة

اما بقى لو كان غاوى فقر وقام بالسلامة فالعداد هيقوم ببث اشاراته على الهواء مباشرة الى كمبيوتر وزارة المالية الذى يقوم بترجمة هذة الاشارات الى ارقام تحدد عدد الانفاس

وسيتم استبعاد الزفير اليا

والعد هيكون على الشهيق فقط

وهيتسجل كل شهقة باليوم والساعة والثانية

هذا وتقول وزارة المالية ان الحومة تدفع 36 مليار جنيه دعما سنويا لتوفير الاوكسجين لزوم تنفس المواطن

كما تنفق 18.6 مليار جنيه للتخلص من العادم الناتج عن عملية الزفير

ورغم ذلك سيتم اعفاء الزفير من الضرائب والاكتفاء بالشهيق مراعاة للبعد الاجتماعى

وتيسيرا على الممول فان وزارة المالية تمنحه الحق فى اخطارها باعتزامه التوقف عن التنفس بشـــــــــــــــرط

ان يتم الاخطار قبل شهرين من وقف ممارسة النشاط

وصبـــــــــــــــــــــــاح النعناع

اي خدمة انا هنا علشان الناس كلها فين شادي انا عاوز شادي

انا بحبك علشان بتتكلم بلسان كل الناس